Светлагорцы супраць кітайскага заводу

Чарговы агмень побытавага непадпарадкавання рашэнням уладаў успыхнуў у Беларусі. Гэтым разам - Светлагорск.

У Светлагорску кітайскі бок будуе экалагічна небяспечны завод цэлюлозы.

Будаўнічыя працы пачаліся, але архітэктурнага праекту дагэтуль не прадставілі (паводле яго следам павінна быць праведзеная экалагічная экспертыза).

У горад прыехалі кітайскія будаўнікі, здымаюць дамы і жывуць там дзясяткамі, спяць на двух'ярусных ложках.

Жыхары Светлагорску абураюцца, што цэтлікі ва ўніверсамах пачалі дубляваць па-кітайску - каб прыбыўшым будаўнікам было зразумела.

Супраць будаўніцтва заводу сабраныя больш за 10 тыс. подпісаў гараджанаў (усяго ў Светлагорску жыве 70 тыс. чалавек), але адказу на пасланы ў высокія інстанцыі ліст не атрымалі.

У студзені быў сход грамадскасці, на якім 99% удзельнікаў выказаліся супраць будаўніцтва заводу ў горадзе, дзе і так экалагічна шкоднай прамысловасці шмат.

Грамадскасць занепакоеная, што завод будуюць людзі з краіны, дзе экалагічная сітуацыя вельмі складаная.

Прадстаўнікі ж уладаў адказваюць, што "завод, які будзе пабудаваны, стане адным з найлепшых у свеце на сённяшні дзень".