Кітайцам на 2013 год выдалі 650 тысячаў беларускіх візаў

У Смалявіцкім раёне паўстане другі па колькасці горад Беларусі. Цалкам кітайскі.

Гэту інфармацыю агучыў у сваім акаўнце ў «Фэйсбуку» эканаміст Яраслаў Раманчук.

"Выступаў сёння на Клубе фінансавых дырэктараў. Адзін з удзельнікаў падзяліўся вельмі цікавым інфармацыяй. Калі гэта праўда, то гэта бомба. З гэтай неафіцыйнай, але вельмі дасведчанай крыніцы стала вядома, што на 2013 год беларускія ўлады ўжо выдалі 650000 рабочых візаў для грамадзянаў Кітая.

Кажуць, што гэта толькі пачатак. У наступным годзе яны павінны пачаць працу ў Беларуска-кітайскім індустрыяльным парку. У Смалявіцкім раёне паўстане другі па колькасці горад Беларусі. Цалкам кітайскі", - піша ён.

Як жывуць кітайскія гастарбайтэры, ужо вядома. Там, дзе жывуць чатыры беларусы, могуць размясціцца 20 кітайцаў. Таму 8 тысячаў гектараў зямлі, адведзеныя пад парк, цалкам здольныя змясціць нават большую колькасць кітайцаў.