Расія ўмешваецца ва ўнутраныя справы Латвіі

Так МЗС балтыйскай краіны пракаментаваў крытыку з Масквы наконт адмовы правядзення рэферэндуму аб грамадзянстве.

Каментар Расіі ў сувязі з рашэннем Цэнтральнай выбарчай камісіі не праводзіць другі этап збору подпісаў за нулявы варыянт грамадзянства варта расцэньваць як "спробу інтэрпрэтацыі ўнутраных спраў Латвіі". Пра гэта заявілі ў прэс-службе Міністэрства замежных справаў.

Як заявіў прадстаўнік МЗС Яніс Сіліс, члены ЦВК выконвалі ўсе юрыдычныя працэдуры. Што ж тычыцца выступаў расійскага боку, то яны "не спрыяюць эфектыўнаму і прававому далейшаму разгляду гэтага пытання".

Сіліс таксама адзначыў, што перад тым, як казаць пра дэфіцыт дэмакратыі ў Латвіі, Расіі варта было б звярнуць увагу на ўласную дэмакратыю, станам якой заклапочаныя праваабарончыя арганізацыі.

Нагадаем, 2 лістапада латвійская ЦВК прыняла рашэнне аб адмове ў зборы подпісаў за правядзенне рэферэндума аб прадастаўленні аўтаматычнага грамадзянства неграмадзянам.