«Зялёныя» - у абарону беларуских балотаў

12 грамадскіх арганізацыяў падпісалі адкрыты зварот да беларускіх уладаў з заклікам захаваць балоты ад асушэння.

Цяпер экаабаронцы прапануюць далучыцца да іх усім жадаючым. Грамадская кампанія ў абарону беларускіх балотаў пачалася ў інтэрнэце месяц таму.

Зараз кожны можа зайсці на сайт www.change.org і падпісацца ў абарону. Як распавяла прадстаўнік аргкамітэта кампаніі і таварыства «Зялёная сетка» Вольга Каскевіч, такім чынам эколагі хочуць дабіцца ад Савета міністраў адмяніць пастанову № 794 ад 17 чэрвеня 2011 году і адмовіцца ад планаў па будаўніцтву новых торфабрыкетных заводаў на буйных натуральных балотах Беларусі.

Паводле гэтага дакумента пад асушванне трапляюць 2 натуральныя экасістэмы Гродзенскай вобласці: Святое балота ў заказніку «Азёры» і Дакудаўскае - пад Лідай. Збор подпісаў скончыцца ў лютым наступнага году.