Масква заступілася за гістарычныя міфы

Былы кіраўнік расійскай ФСБ і дэпутат Дзяржаўнай думы Мікалай Кавалёў выказаўся супраць перагляду гісторыі ў Беларусі.

Спробы аднавіць гістарычную праўду пра падзеі, якія, у прыватнасці, адбываліся ў 1939 — 1945 гадах, ён назваў «грамадзянскай вайной паміж гісторыкамі».

Такую думку Мікалай Кавалёў, які ў цяперашняй Дзяржаўнай думе з'яўляецца членам камітэту па бяспецы и процідзеянню карупцыі, а ў ранейшай узначальваў камітэт па справах ветэранаў выказаў падчас відэамосту паміж Масквой і Мінскам.

«Беларусі неаобходна спыніць грамадзянскую вайну паміж гісторыкамі. Яна не садзейнічае выхаванню ў насельніцтва псіхалогіі пераможцаў, што, у сваю чаргу, не садзейнічае фарміраванню патрыятычных пачуццяў», - кажа дэпутат.

Таксама за гістарычныя міфы, на якіх трымаецца афіцыйная ідэалогія сучаснай Расіі, заступіўся і дырэктар «Музею Вялікай айчыннай вайны» у Маскве Уладзімір Забароўскі.

«Сёння вельмі часта сустракаюцца выпадкі перадзергівання фактаў, што ў сваю чаргу садзейнічае адыходу ад сяброўскіх адносінаў», - сказаў ён.

Мікалай Кавалёў дадаў, што ён незадаваолены тым, як успрымаецца паход Чырвонай арміі на Захад у Другую сусьветную вайну і адзначыў, што шмат дзе яго называюць акупацыяй.

Напрыканцы дэпутат заклікаў увесці крымінальную адказнасць за адмову высноваў Нюрнбергскага трыбуналу і «вызваленчай» ролі Чырвонай арміі.